Izvori iz policije i nekoliko svjedoka kažu da se fatalni incident dogodio nešto poslije 2.30 ujutru. Tada su policajci dobili poziv da je upucan čovjek u kuglani u Hjustonu.

U njegovom društvu bio je još jedan član benda, njegov ujak Kuavo. 

"Rečeno nam je da su Tejkof i Kuavo igrali kockice kada je izbila svađa i tada je neko otvorio vatru, pucajući u Tejkofa. Upucan je u glavu ili u blizini glave. Na licu mjesta je ostao mrtav", kaže izvor.

Na sajtu TMZ objavljene su i slike s mjesta događaja, gdje se vidi Kuavo i drugi okupljeni oko Tejkofa. Prvo su pokušali da ga pomjere, ali su ga onda spustili, a Kuavo je povikao da neko pozove pomoć.

Policija kaže da su još dvije osobe upucane i prevezene u bolnicu privatnim vozilima. Kuavo nije povrijeđen.

Samo nekoliko sati prije pucnjave, Tejkof je objavio selfi iz kuglane.

Tejkof, čije je pravo ime Kiršnik Kari Bal, bio je najmlađi član Migosa. Kuavo je bio njegov ujak, a Ofset njegov rođak.

Okupili su se kao grupa 2008. godine u Džordžiji i postali multiplatinasti hitmejkeri, izbacivši svoj prvi veliki hit "Versace", 2013. godine. Bili su broj jedan na Bilbordu 2016. sa "Bad and Boujee".

Grupa Migos je nastupala na festivalu Exit u Novom Sadu 2018. godine, a njihov nastup bio je jedan od najupečatljivijih te godine.