Nastavak sage oko dječaka iz zagrebačke škole: Umjesto na posmatranje odveli ga u inostranstvo

Kako pišu, majka dječaka prekjuče je javila ustanovi u kojoj je dječak trebao da provede tri nedjelje na posmatranju tima stručnjaka da su promijenili boravište i da se nalaze izvan Hrvatske. Rekla je da će naknadno javiti u kojoj su državi i gdje, ali to još nije učinila.

To znači da je prekinuta stacionarna opservacija dječaka, s kojom se, prema odluci Porodičnog suda, započelo prije dvije nedjelje. 

Kako piše Telegram, već drugi dan nakon što su roditelji odveli dječaka u stacionar, upravi su dostavili izvinjenje privatne pedijatrijske ambulante, u kojoj je pisalo da dječak mora da ostane kod kuće zbog problema s probavom. Izostajanje se produžilo još nedjelju dana, a majka se juče javila na telefonske pozive i obavijestila stacionar da su se odselili iz Hrvatske.

Nasilje je prijavljeno još u novembru prošle godine

Podsjetimo, vršnjačko nasilje dječaka prvi put je prijavljeno lani u novembru u Osnovnoj školi Miroslava Krleže. Roditelji su tada upozoravali direktorku i stručnu službu na problematično ponašanje dječaka. U decembru su nastavili s pisanim prijavama.

Početkom februara su ponovno pisanim putem prijavili vršnjačko nasilje školi, Gradskoj kancelariji i Ministarstvu. Niko nije reagovao. 

Šta se tokom svih tih mjeseci događalo u školi? 

Advokat roditelja navedene djece Ana Marija Vegar rekla je za Indeks da je nad 15 djece trajalo dugotrajno fizičko, psihičko i seksualno uznemiravanje.

"Kad govorim o fizičkom nasilju, tu govorim o šakama u potiljak, guranju učenika. Odgurnut je i učenik koji je udario glavom o sto i zadobio podliv ispod oka. Psihičko maltretiranje svodi se na najgore moguće uvrede. Treba reći da dječak ne razlikuje vršnjake od vršnjakinja, to nasilje se vrši nad svima tako što ih pritisne uza zid i imitira seksualni čin te uzvikuje ‘one minute sex‘, gura prste djevojčicama i dječacima oko genitalija... Dječak je mjaukao, lajao, bacao se po podu i nikad nije pokazivao žaljenje zbog toga što radi", navela je.

To je bilo u učenikovoj drugoj školi. Iz prve škole je, nezvanično saznaje medij, ispisan jer je jednom učeniku slomio ruku.

U školu dolazila policija

Sve ovo dovelo je do toga da je desetero djece u OŠ Miroslava Krleže zatražilo psihološku pomoć, a učiteljica je bila na bolovanju. Tada je i otac dječaka, kako je ispričao jedan roditelj, prijetio ostalim roditeljima.

Škola, njen osnivač Grad Zagreb i Ministarstvo nisu ništa konkretno preduzimali osim što su učenika izdvojili iz razreda, piše Indeks. U ovoj školi je zabilježena incidentna situacija kad su roditelji dječaka upali u školu jer im je sin izdvojen, zbog čega se učiteljica s učenicima zaključala u razred. Intervenisala je policija.

Učenici, njih 14, ispisali su se iz škole.

Zbog ovog učenika došlo je ponovno do sloma sistema u novoj zagrebačkoj školi, u kojoj je i direktor, očigledno zbog nemogućnosti da riješi situaciju, dao ostavku. Nakon višenedjeljnih protesta roditelja učenika koji idu u razred s dječakom i bojkota nastave, direktor se vratio na posao.

Roditelji su problematičnog dječaka odveli na drugu procjenu, saznao je RTL.

Krajem oktobra djeca su se u novoj školi vratila na nastavu. Ministar obrazovanja Radovan Fuchs tada je rekao da će učenik problematičnog ponašanja biti na vještačenju tri nedjelje, a možda i duže. Na novinarsku tvrdnju kako problem nije trajno riješen - djeca će ići u školu jer su dobili garancije da dječak privremeno neće biti u razredu - Fuchs je uzvratio kako taj dječak neće biti u razredu "najmanje dvije do tri nedjelje, koliko je predviđena njegova obrada, a to može biti i nešto duže".