Banka greškom proglasila baku mrtvom, 10 dana nije mogla da dođe do novca

Belgijanka Veronika (68) nedavno je zapala u probleme, ali ne svojom krivicom. Sve je počelo krajem aprila, kada je pokušavala da izađe sa parkinga jedne klinke, ali nikako nije mogla da plati bankovnom karticom. Istog dana otišla je u svoju uobičajenu ekspozituru, ING de Stockel, kako bi razjasnila stvari, piše RTL.be.

Na šalteru je objasnila problem, a bankar je u sistemu pronašao da je ona mrtva, i to već deset dana!

- Bila sam malo zatečena, ali u početku mi je bilo smiješno. Rekla sam im: ‘Imate živog mrtvaca pred sobom‘" - prisjetila se penzionerka.

Međutim, slučaj nije glatko riješen. Iako je ova baka kod sebe imala dokumenta, to nije bio dovoljan dokaz da je živa.

Sutradan se vratila u banku sa dokumentom iz opštine koji potvrđuje da je živa. Međutim, račun joj je ostao u blokadi. Nesrećna baka je nedjelju dana svakog dana odlazila na šalter, ali problem nikako nije mogla da riješi.

Stizali su na naplatu razni računi, trebalo je kupiti hranu, a ona do svog novca nije mogla. Srećom, kod kuće je imala nešto gotovine, a i vlasnica je još jednog računa s kojega je bez problema mogla da uzima novac.

Tek nakon deset dana račun joj je odblokiran, a cijeli postupak je trajao tri minuta.

U banci su priznali kako je ovakav slučaj izuzetno rijedak. Kako navode, obaviještenja o smrti se dobijaju od nadležnih PIO fondova, notara, djece, partnera, drugog člana porodice ili poznanika pokojnika.

- Niz mjera omogućuje izbjegavanje ljudske greške (dvostruka provera, računarski pregled itd.). Ali postoji mogućnost da će doći do greške, čak i ako je minimalna - navode u banci.

Nakon što vijest o smrti korisnika stigne u banku, računi te osobe odmah se blokiraju.

Iako je baka prošla golgotu da bi došla do svog novca, portparolka Febelfina, belgijske federacije finansijskog sektora, navodi da su ove mjere "razumne".

- Ova mjera ima za cilj zaštitu nasljednika, da se spriječi pražnjenje računa prije podmirenja ostavine, da se spriječi da osoba podigne novac bez pristanka nasljednika - rekla je portparolka.