Teška razmjena vatre izbila je juče u glavnom gradu Haitija Port o Prensu, a vođa jedne od najvećih uključenih bandi govorio je o koordinisanim napadima čiji je cilj svrgavanje osporavanog premijera Ariela Henrija.
Pucnjava se čula u nekoliko četvrti u području glavnog grada, dok su snage sigurnosti pokušavale da odbiju napadače koji su ciljali policijske stanice, policijsku akademiju i druga strateška mjesta poput aerodroma, prenosi Index.hr.
Škole, univerziteti i razne javne i privatne ustanove obustavile su svoje aktivnosti, dok su se stotine ljudi sklonile u svoje domove.
Studenti bili taoci
Studenti Državnog univerziteta Haitija uzeti su kao taoci prije nego što su pušteni, rekla je dekanica agronomskog fakulteta Joselin Luisaint za AFP. Najmanje jedan student je upucan i povređen u napadu, dodala je.
Nekoliko avionskih kompanija otkazalo je svoje unutrašnje i međunarodne letove nakon što su projektili pogodili avione i dijelove terminala aerodroma Tusant-Lovertur.
"Sve naoružane grupe će djelovati kako bi ishodile odlazak premijera"
Od atentata na predsjednika Jovenela Moisea 2021. godine, Haiti se suočio s ozbiljnom političkom, sigurnosnom i humanitarnom krizom, a naoružane bande preuzele su kontrolu nad velikim dijelom zemlje dok broj ubistava raste. Na vlasti od 2021, Ariel Henri trebalo je da ode s dužnosti početkom februara.
"Danas objavljujemo da će sve naoružane grupe djelovati kako bi ishodile odlazak premijera Ariela Henrija", rekao je vođa bande Džimi Čeriser, u videu objavljenom na društvenim mrežama.
"Upotrebićemo sve strategije da postignemo ovaj cilj. Preuzimamo odgovornost za sve što se trenutno događa na ulicama", dodao je.
Premijer Ariel Henri je trenutno u Keniji, zemlji koja će voditi UN-ovu misiju pomoći policiji u borbi protiv bandi. UN su juče objavile da je pet zemalja potvrdilo svoje učestvovanje u ovoj koaliciji, a to su Bahami, Bangladeš, Barbados, Benin i Čad.
(Telegraf)
