Vino od kupina čuva srce i ima još mnogo blagotvornih dejstava. Ukus je, naravno, fenomenalan, ali ako pronađete više kupina možete napraviti i medovinu i viski od kupina.

Vino od kupina

Postoji nekoliko recepata, neki ljudi su već navikli na svoje standardne recepte, ali za one koji se u ovu priču upuštaju prvi put, donosimo jedan jednostavan recept.

Sve što vam treba su šećer i kupine (odnos je 1:5, odnosno ako imate 5 kg kupina, treba vam 1 kg šećera - mada, ako su kupine slađe, neće vam biti potrebno toliko šećera. Sami procijenite). Pripremite velike čiste tegle. U njih sipajte red kupina, pa red šećera. Ipak, ne punite ih do vrha, napunite tek 2/3 tegle. Poklopite tanjirićima i ostavite da stoji 10 dana, povremeno miješajući. Poslije 10 dana tečnost procijedite kroz gazu i stisnite dobro rukama da iscijedite što više iz kupina. Dobijeni sok sipate u čiste tegle. Ponovo poklopite tanjirićima i ostavite punih sedam dana da stoji. Sada dobijenu osnovu za vino presipate u flaše, poredate ih na neko tamno i malo hladnije mjesto, pa sve prekrijete krpom (ne punite flaše skroz do vrha). Sada ide proces procjene. Vrenje može da traje desetak ili više dana. Neki ljudi vino ostave duže, pa u toku procesa vrenja ga još jednom procijede i prespu u čiste flaše. Nakon toga probajte vino (kada prestane, kako kažu, da "šušti") i ako ocijenite da je spremno, samo flaše začepite - najbolje plutenim čepovima i držite na tamnom i hladnom mjestu. Po nekim receptima dodaje se i vinobran i kvasac, ali mi vam, ipak, preporučujemo da se držite ove jednostavnije, starinske verzije.

Medovina od kupina

Ovo je najzdravija verzija vina od kupina. Priprema se, naravno, sa medom. Potrebno vam je: 1-1,5 kg livadskog meda, 1-1,5 kg svježe ubranih divljih kupina, 1 piment (jamajkanski biber, ali nije obavezno), 1 karanfilić, prstohvat suve narandžine kore i svježi sok od limuna.

U veliku šerpu uspite 3,8 litara vode, pa ubacite piment (ako koristite), karanfilić i koru narandže. Sve stavite na šporet da se kuva. Dok se voda zagrijava, veliku kantu dobro operite i dezinfikujte, pa ubacite kupine i polijte s malo limunovog soka (po želji - može to, recimo, biti sok od jednog limuna).

Kada voda počne da kuva, isključite šporet i sklonite šerpu. Dodajte med i dobro promješajte. Ovu mješavinu sipajte preko kupina i dobro promiješajte. Ukoliko nemate poklopac za kantu, možete preko nje prebaciti peškir i zavezati ga, da bi se mješavina ohladila i da biste spriječili muve i mrave da se utope u vašoj medovini.

Ostavite smjesu da se ohladi preko noći, pa ujutro dodajte kašičicu vinskog kvasca, pa dobro promiješajte. Sve ponovo pokrijte kako je i bilo, pa ostavite nekoliko dana. Procijedite kroz gazu, pa dobijenu tečnost sipajte u čiste flaše (ali ne skroz do vrha i ne stavljajte čepove). Nakon sedam dana, ponovo procijedite vino, pa prespite u druge flaše. Ostavite na tamnom i hladnijem mjestu petnaestak dana. Kada je vrenje završeno, flaše zatvorite plutenim čepovima.

Viski od kupina

Ovaj napitak ima ukus kao liker ili džin od trnjina, ali sa sasvim drugim sastojcima. Da biste ga napravili u čistu teglicu uspite kupine i šećera po želji. Uspite bilo koji viski, dobro zavrnite poklopac na tegli i promućkajte. Ostavite da odstoji što duže mućkajući svaki dan. Možete ostaviti kupine tako i godinu dana (tada će biti najbolje). Poslije mogu poslužiti kao odličan desert, uz sladoled ili druge poslastice.