TV kanal Histori "izbacio" je iz svoje serije "Biblija" Satanu jer je zasjenjivao Isusa Hrista, objavili su elektronski mediji.

Producenti su odbacili tvrdnje da je takva odluka donjeta zbog sličnosti glumca koji igra Satanu i američkog predsjednika.

Spekulisalo se da su producenti koji rade na dvočasovnoj dokumentarnoj drami o Isusu Hristu odlučili da "izbace Satanu" jer marokanski glumac Homamen Mehdi Uazani koji igra Satanu previše liči na američkog predsjednika Baraka Obamu, što je izazvalo burne reakcije na društvenim mrežama.

"Zadovoljstvo mi je da objavim da se đavo našao na podu sobe za montažu", rekao je producent Roma Dauni.

"Željeli smo da fokus našeg djela 'Son of God' bude na Isusu, da svi govore o njemu i zbog toga smo izbacili Satanu", rekao je Dauni.

Desetočasovna serija "Biblija" prikazana je u SAD u martu prošle godine a producenti su za kraj februara najavili dvočasovni dio serijala pod nazivom "Son of God".