Konta, trenutno 48. teniserka svijeta, savladala je Vilijams sa neočekivanih 6:1, 6:0.

Vilijams se u martu ove godine vratila na teniske terene poslije pauze zbog porođaja, pri kojem je imala neke potencijalno teške komplikacije, a najveći uspjeh od tad ostvarila je na nedavno završenom Vimbldonu, gdje je stigla do finala.

Serena nije imala pretjerano teške protivnice do finala, ali je uspijevala da dođe do zasluženih pobjeda zbog kvalitetne igre, u kojoj je prije svega problem bilo loše kretanje. U završnom meču tada je poražena od Anđelik Kerber 2:0 u setovima, poprilično rutinski, ali niko nije očekivao ovakav rezultat u prvoj rundi San Hozea.

Amerikanka je povela sa 1:0 u prvom setu i činilo se da je spremna da Konti pruži više nego pristojan otopr, ali od tog trenutna nije osvojila ni jedan jedini gem do završetka meča.

Dodatno čudi ishod meča s obzirom da je Serena dobila jedini prethodni međusobni susret sa Kontom, i to veoma ubjedljivo prošle godine u četvrtfinalu Australijan opena sa 6:2, 6:3.

Konta je tako ostvarila jednu od većih pobjeda u karijeri, nakon što je odigrala neočekivano loš dio sezone na travi.

Najbolja teniserka svih vremena je pretrpjela jedan od, ako ne i najteži poraz u svojoj karijeri, a vidno nezadovoljno je izgledala na terenu poslije meča, a i na konferenciji za medije.

Serena je prije ovog debakla najubjedljiviji poraz imala od Simone Halep u finalu završnog turnira 2014. godine, kada je poražena sa 6:0, 6:2.