Državljanin Srbije Ivan Rudić osuđen je pred Apelacionim sudom u Italiji na doživotnu robiju zbog ubistva građevinskog radnika Konzolata Ingenua. 

Osim njega osuđen je i rumunski državljanin Mihaj Apopej, a obojica su se teretila da su građevinca pretukli, pa njegovo tijelo bacili sa litice i sakrili tragove zločina.

Rudić, inače vozač šlepera, po presudi je pretukao Ingenua, a njegov prijatelj Apopej, pomogao je da se otarasi tijela. On je već bio osuđen na doživotnu robiju, a sada je ta kazna i potvrđena.

"Zločin se dogodio u ljeto 2019. godine. Rudić je navodno cijele večeri pio u baru u Toleu sa pokojnikom, sa kojim se na kraju i posvađao. Poslije svađe, počeli su da se tuku, pa je Rudić besomučno i do smrti udarao građevinca. Na kraju je sa Rumunom tijelo prevezao do litice, gdje ga je bacio da bi inscenirao nesreću", navode mediji.

Istražitelji su brzo uspjeli da rekonstruišu zločin, a protiv osumnjičenih su sakupljeni brojni tragovi.

"U automobilu žrtve koji je pronađen napušten otkriveni su tragovi krvi", pišu mediji.

Kako navode, Rudić i njegovi prijatelji sve vrijeme su se izjašnjavali kao nevini.