Restoran u kom je mjesečno ubijano 300 mačaka zbog pripreme lokalnih specijaliteta zauvijek je zatvoren.
Pam Kuok Doan (37) vodio je pet godina restoran u Taj Ngujenu na sjeveru Vijetnama.
"Specijalitet od mačjeg mesa", pisalo je na natpisu ispred restorana sa fotografijom crne mačke razrogačenih očiju u gornjem desnom ćošku.
Jedenje mačaka relativno je uobičajeno u Vijetnamu gdje se njihovo meso smatra afrodizijakom, amajlijom za sreću, ali i superhranom koja jača zdravlje i štiti od kovida.
"Prije nego što sam prodavao mačje meso posluživao sam normalnu hranu i piće, međutim, prihodi nisu bili dovoljni da pokriju troškove života moje porodice. Tada sam pokušao da prodajem mačje meso jer nije bilo nijednog restorana sa takvom ponudom u okolini", kaže otac dvoje djece.
Jednu po jednu, Doan bi utopio mačke u kantu, držeći ih štapom. Teško mu je palo saznanje da su neke od životinja koje je ubijao prethodno bile nečiji kućni ljubimci.
"Bilo mi je žao kad sam vidio kako pate tokom klanja. Sve je bilo zbog novca jer sam morao da zaradim za porodicu", dodaje Doan koji je otac dvoje djece.
Doan se za pomoć obratio udruženju za prava životinja HSI koja je prošle godine započela kampanju protiv trgovine mačjim mesom u Vijetnamu. Sklopio je dogovor za jednokratnu pomoć za zatvaranje restorana spašavajući živote 20 mačaka i mačića u kavezima. Program nudi finansijske podsticaje vlasnicima restorana s mačjim mesom da se prebace na druge izvore zarade i daju mačke na udomljavanje.
Mačke su odvedene u centar za spašavanje životinja i uskoro će biti date novim vlasnicima.
HSI je inače uspješno vodila i kampanju za zatvaranje dva restorana sa psećijim mesom u Taj Ngujenu.
"Oduševljeni smo što zatvaramo našu prvu trgovinu mačjim mesom u Vijetnamu i nadamo se da će to biti prva od mnogih jer se sve više ljudi poput gospodina Doana okreće od ove okrutne trgovine", navode iz organizacije.
