Glumac Miloš Biković je privatan život uvijek držao daleko od očiju javnosti, a svoju porodicu takođe ne eksponira često. Ipak, poznato je da je posebno vezan za starijeg brata Mihaila, koji je iguman i monah u SPC.
Miloš Biković je jednom prilikom progovorio o bratu Mihailu, kojim se ponosi isto koliko i on njime.
– Moj brat je otišao u manastir kada je imao 22 godine, a studirao je s potomcima ruskih emigranata koji su došli u Srbiju nakon Oktobarske revolucije. Važno mi je da kažem da s njim pričam kao sa bratom, ali se uvijek sjetim da je on ipak monah koji je svoj život posvetio Bogu. Ponekad, u razgovoru poželim da mu protivrječim, ali umjesto toga, uvijek mu kažem: “Razmisliću o tvojim riječima” – ispričao je Miloš tada za rusko izdanje magazina Еsquir.
– Objasnio mi je da nikada nije osjetio takvu punoću života i da ju je pronašao jedino u dodiru sa Bogom. Kada je moja slava premašila sve ono što sam očekivao, sjećam se da mi je brat rekao: “Sada više nisi bitan samo ti. Sada si postao simbol.” On je na neki način počeo da mi se divi, iako ja to nikada nisam očekivao jer je to neobično za jednog monaha. On dobro zna koliko i kada se ja lomim i sumnjam u sebe – ispričao je iskreno Biković.
Mihailo je starješina manastira Jovanja, a glumac je u blizini kupio kuću, što govori koliko je Miloš vezan za njega.
