Obradović: "Stvarno me boli kad vidim kako smo igrali protiv Reala"

Partizan u petak od 20.45 igra u Vitoriji protiv španske ekipe, a na megdan joj stiže poslije poraza od Reala u Madridu.

"Imali smo sastanak u hotelu na kome smo gledali prvo poluvrijeme protiv Reala. Nešto manje vremena smo posvetili Baskoniji. To je tim koji voli da igra u tranziciji, daju veliki broj poena, ali i primaju veliki broj poena. Šut za tri i skokovi su dominanti, svi šutiraju i to je najvažnija stvar. To je neka taktika, ali je ona sada najmanje važna. Naš pristup utakmici je bitan i da igrači shvate da agresivnost mora da bude na drugom nivou i da moramo da budemo pametniji u fazi napada. Igrači su toga svjesni, zato smo imali dug sastanak, oni su pre ovog treninga bili u teretani na njihovu želju", rekao je Obradović za Mocart sport.

Kako kaže, njegov tim mora da se potrudi, jer uspjeh neće doći na poklon.

"To je naš život, meni nekada bude žao što neke stvari moram da ponavljam igračima. Ako nešto želiš da uradiš, moraš malo da se mučiš i da pokažeš da ti je stalo, mene to stvarno boli kada ekipa za četvrtinu primi 28 poena i napravi jedan faul i to na šutu. A onda smo nastavili tako, pa napravimo namjeran faul. To su nenormalne stvari. Ja treba da se vratim na ono koliko je ljudi došlo iz Beograda i iz Evrope da prati utakmice u Madridu i Vitoriji. To mora da bude motiv, mora i igračima. Ne sme utakmica da liči na onu iz Dubaija. Nema ništa bez borbe, ako nisi spreman da pomogneš nekome, jer ovo je igra pet na pet, a ne jedan na jedan".

Otkrio je i da se košarkašima prije puta u Vitoriju jasno obratio.

"Razgovoram onako kako čitav život to radim. Direktno. Nemam šta da tapšem nekoga ako to nije zaslužio. Svi oni to znaju i svjesni da je to moj posao. Ako ja gledam kroz prste onda možemo da budemo samo posljednji".

Iako je Partizan loše počeo protiv Reala, vratio se u posljednjoj dionici i prišao na minus 4.

"Nije samo pet minuta protiv Reala, nego i protiv Armanija i Efesa. Igrači znaju da imaju kvalitet, moramo da krenemo od svakog pojedinca i zašto neki igrači nisu uvijek skocentrisani. Ova liga je čudo, toliko je izjednačena da svaka pobjeda pravi razliku".

Obradović očekuje reakciju protiv Basknonije.

"Nemam vremena, pratim rezultate, ali neka se svako bavi svojim problemima. Želim da vidim reakciju. Ima i Baskonija problema, ali kako god, očekuje nas tim koji će maksimalno da igra, dovoljan je primjer što su prije pet dana okrenuli 20 razlike protiv Real Madrida", poručio je Obradović.